महाराज सांगाल काय हो

महाराज सांगाल काय हो मार्गाच्या मर्मा ?

कुण्या पथी मी जाइन तुमच्या समाधानधामा ?॥धृ॥

कुणि सांगे ‘करि पाच पूर्णिमा’

कुणी म्हणे ‘जा नित गुरुग्रामा

पारायण करि, धरि उपवासा’

येईल का कामा ? ॥१॥

कुणी म्हणे ‘जा सेवेसाठी

प्रदक्षिणा करी, काढी उष्टी

वचन-प्रवचने धरि तू कंठी’

येईल का कामा ? ॥२॥

कुणि पूजा करि अष्टौप्रहरी

कुणि आरति करि जाइ घरोघरि

चर्चा करि अन् सांगे जगाला

येईल का कामा ? ॥३॥

‘प्रपंच, तू ते तसेच राहो

परि फोडी नामाचा टाहो

बारीमध्ये दिवसही जावो’

येईल का कामा ? ॥४॥

कितीक वाटा चालुनि दमलो

मार्ग मते मी पाहुनि श्रमलो

समाधान मज कुठे न गवसे

समजावा मर्मा ! ॥५॥

‘प्रेम , नाम , कर्तव्यी तत्पर

वृत्यंतर, अभ्यास निरंतर

मीच तुझ्या येईन घरी रे

दीना धरि मर्मा !’॥६॥

‘याच पथी तू येशिल माझ्या समाधानधामा... !!’