गणपती मनोहरमूर्ती

गणपती मनोहरमूर्ती ।

करिती मंगल नित जगती ॥धृ॥

भव्य दर्शनी, विशाल श्रवणी ।

सिद्ध जे सदा, भक्तरक्षणी ।

नयन कृपा बरसती,

ज्यांचे, नयन कृपा बरसती ॥१॥

काळ-स्थिती-गुण त्रिविध व्यापिती ।

परी सदा ते अतीत असती ।

हाकेला धावती,

संकटी, हाकेला धावती ॥२॥

प्रश्न जगी हे दुर्बुद्धीचे ।

गणेश दैवत शुद्धबुद्धिचे ।

प्रकाश जे दाविती,

बुद्धिला, प्रकाश जे दाविती ॥३॥

दीनभक्त शरणागत चरणी ।

एक भाव या श्री गजाननी ।

भव तरुनी नेती,

नामे, भव तरुनी नेती ॥४॥