खरी सुखशांती मिळवाया

खरी सुखशांती मिळवाया ।

ठायी कल्याण साधाया ।

कुणि मिळवा रे रामराया ।

कुणि जागवा रे रामराया ।

अंतरिच्या रे देवराया ॥धृ॥

सुखासाठी जमिनी, इमले ।

कुणि सत्तेसाठी झटले ।

मान, पैशासाठी झुरले ।

बुवाबाजी, व्यसना भुलले ।

तरि शांती ना पावले ।

जगि थोर लोकही भ्रमले ।

कल्याणाचे मर्म कळाया ॥१॥ कुणि मिळवा रे...

नच शांति, विषय स्पर्धेचा ।

नच बाजारी घेण्याचा ।

आभास सर्व सौख्याचा ।

अंती ठरतो अस्वास्थ्याचा ।

घेतो घास काळ जन्माचा ।

होई सावध तो भाग्याचा ।

नरदेह व्यर्थ नच जाया ॥२॥ कुणि मिळवा रे...

देव प्रत्येकाच्या हृदयी ।

प्रेमी, सत्य, संयमी, न्यायी ।

नामे जागृत करता येई ।

कृति वृत्ति देवमय होई ।

राममय जे जीवन जाई ।

सुख साधे बसल्या ठायी ।

दीन विनवी तुमच्या पाया ॥३॥ कुणि मिळवा रे ...