रामभक्त साध्वी अंबिकाबाई यांची आरती

ओवाळू अंबिके जय जय रामहृदयवासी ॥

विठ्ठलास साकडे घालुनी भक्तिपंथ धरिसी ॥धृ॥

मुंबईत नियतीने नेले ।

संसारा थाटुनिया दिधले ।

दोन लेकरा पदरी दिधले ।

पंचविशित परि पती हरपले ।

आघाता सोशी ॥१॥ ओवाळू अंबिके...

उभय कुळांचा आश्रय नुरला ।

पंढरिचा आधार गाठला ।

लेकुरांसवे प्रार्थित त्याला ।

सगुण घेउनी सवे विठ्ठला ।

आलिस गावासी ॥२॥ ओवाळू अंबिके...

विठ्ठल घाली रामपाउली ।

देवधर्मशाळाही दिधली ।

नाम घेत कर्तव्ये केली ।

काया सेवेमधे झिजविली ।

अखंड उपवासी ॥३॥ ओवाळू अंबिके...

वाचुन घेउन प्रवचन प्रतिदिन ।

दीनमनी बोधासी घटवुन ।

भक्तिवारसा अंती देउन ।

ध्यास मनी रामाचा घेउन ।

रामरूप होसी ॥४॥ ओवाळू अंबिके...