संकल्प, आवाहन, प्राणप्रतिष्ठा

श्री गणेशाय नम: ॥

श्री सरस्वत्यै नम: ॥

श्री सद्गुरवे नम: ॥

देववाणीस नमुनी, मराठी मंत्र हे दिले ।

शारदा प्रेरणेने जे, कळण्या करण्या भले ॥

उपचार करणे म्हणणे, व्हावे सुलभ त्यातुन ।

दक्षिणा मात्र वेदज्ञा, देणे आदरपूर्वक ॥

शुचिर्भूतपणे बसुनी देवासन्मुख आसनी ।

उच्चार करणे आता कृतीची जोड देउनी ॥

प्रार्थना हे गणेशा तुज, भावे वंदन मी करी ।

विघ्ने सर्व हरूनिया, नेई कार्यास सिद्धिला ॥

सुपारीच्या गणेशाला, पूजा उपचार अर्पिणे ।

खोबरे गूळ नैवेद्य, दाखविणे नमनासह ॥

॥श्रीराम॥

ओंकारात खरा एक, तोच विष्णु सहस्रश: ।

नामे चोवीस ती त्याची स्मरणे नमुन नित्यश: ॥

पळीत घेउनी पाणी पिणे ते स्मरणपूर्वक ।

आचमन हाच आरंभ पूजेचा शुभकारक ॥

केशवा पहिले नमन दुसरे नारायणास ते ।

माधवा तिसरे नमन गोविंदा चवथे असे ॥

विष्णूस पाचवे नमन सहावे मधुसूदना ।

सातवे त्रिविक्रमाला ते, आठवे नमन वामना ॥

नववे श्रीधरा नमन हृषीकेशास दशम ते ।

पद्मनाभास अकरावे दामोदर नमू मने ॥

संकर्षणास तेरावे चौदावे वासुदेव हे ।

पंधरावे नमन प्रद्युम्ना सोळावे अनिरुद्ध हे ॥

पुरुषोत्तम सतरावे हे अठरावे श्री अधोक्षजा ।

नारसिंहास नमन विसावे अच्युतास हे ॥

जनार्दन एकवीसावे बाविसावे उपेन्द्र हे ।

तेविसावे नमू हर हे श्रीकृष्णाय नमो नम: ॥

प्राणायाम करू नंतर घेऊ हातात अक्षता ।

समजुनी म्हणुया मंत्र पूजासंकल्प सोडता ॥

महागणपतिस्मरण, श्रीगुरूंचे तसे करू ।

सरस्वती, वेद, वेदपुरुष, इष्टदेव नमू तसे ॥

कुलदेवता स्थानदेव, तशी ती वास्तुदेवता ।

शचीपुरन्दर आदिक या, नमुया सर्वदेवता ॥

उमामहेश्वरांस नमन, आईवडिलही नमू ।

कालकामपरशुराम सर्व देव तसे नमू ॥

नमुया ब्रह्मवृंदांस निर्विघ्न सर्व हे असो ॥

सुमुख-एकदन्त अन्, कपिल गजकर्णक ।

लम्बोदर तसा विकट, विघ्ननाशक, गणाधिप ॥

धूम्रकेतु, गणाध्यक्ष, भालचंद्र, गजानन ।

बारा पवित्र नामे ही, म्हणे जो ऐकतो तसा ॥

विद्यारंभ, विवाहात, येता, जाता कुठे कसा ।

संग्रामी, संकटी त्याला, विघ्न ना येतसे कधी ॥

॥श्रीराम॥

इतुका मंगलाचरण संक्षिप्त करुनी अता ।

उच्चारू आज दिवसाची जी जी शक्य विशेषता ॥

शालिवाहन शकातील शार्वरी संवत्सर हे असे ।

दक्षिणायन, ऋतु वर्षा, भाद्रपद शुद्ध पक्ष हा ॥

त्यातील चतुर्थी तिथि चे, हस्त नक्षत्र योग जे ।

करण, वार यांचाही, उच्चार करणे इथे ॥

ऐशा गुणविशेषांची तिथी ही शुभकारक ।

स्मरुनी संकल्प करुया आता कल्याणकारक ॥

माझ्या तशा कुटुम्बाच्या परिवाराच्या तशाच त्या ।

आरोग्यक्षेम स्थैयार्थ शान्तिऐश्वर्य वाढण्या ॥

घडण्या मंगल सर्वांचे होण्यास प्रगती तशी ।

श्रुतिस्मृतिपुराणात दिलेले फल साधण्या ॥

मातृभाषेत संक्षिप्त, मंत्रांसह करु पूजन ।

श्री मृण्मय गणेशाचे भावे उपचारपूर्वक ॥

एवढे स्मरुनी सारे अक्षतांसहित जल तसे ।

ताम्हनात तसे सोडू, पूर्ण संकल्प जाहला ॥

॥श्रीराम ॥

आता मृण्मय गणेशात प्राणांची स्थापना करू ।

आकारा मूर्ति येण्याच्या क्रियांचे स्मरण ते करू ॥

त्यासवे अक्षरे दिव्य काही उच्चारणे तशी ।

भरती ती प्राण मातीत सजीव करित मूर्तिला ॥

॥श्रीराम ॥

हेरंब स्मरणामध्ये माती आणून भिजवणे ।

सुमुखाचे नाम घेऊनी मूर्ती ही शुद्ध घडविणे ॥

गौरीसुतास नमुनी मूर्तीची स्थापना करू ।

मंत्रांनी मूर्तिच्या मध्ये, प्राण आता असे भरू ॥

ब्रह्माविष्णुमहेश्वर हे, मंत्रांचे ऋषि होत या ।

चतुर्वेद असे छंद, क्रियामय शरीर हे ॥

प्राण ही देवता येथे आं हे बीज इथे असे ।

ऱ्हीं शक्ति क्रौं कीलक ही प्राणांची स्थापना असे ॥

आता जशी दिली येथे उच्चारी अक्षरे तशी ।

प्राणावाहन होण्यास तीन वार क्रमे तशी ॥

ॐ आं ऱ्हीं क्रों अं यं रं लं वं शं षं सं हं ळं क्षं ।

उच्चारणे इथे येवो, प्राण मूर्तीत स्थिर असो ॥

ॐ आं ऱ्हीं क्रों अं यं रं लं वं शं षं सं हं ळं क्षं ।

उच्चारणे इथे येवो, जीव मूर्तीत मृण्मय ॥

ॐ आं ऱ्हीं क्रों अं यं रं लं वं शं षं सं हं ळं क्षं ।

तिसऱ्या उच्चारणे आता, येवो मूर्तीत सर्वही ॥

वाचा इंद्रिये डोळे, कान आणिक जीभ ती ।

घ्राणेंद्रिय तसे अवयव, हातपायादि येउ दे ॥

सुखाने सर्व येऊन, येथे नांदोत सर्वदा ।

देहव्यापार होवोत, देवो घेवोत शुभ सदा ॥

प्राण संचारता मूर्ती, झाली स्थिर सजीव ही ।

पंधरा संस्कार होण्यास पंधरा ओंकार म्हणु अता ॥

आता न हलविणे मूर्ती, पायाशी वाहू अक्षता ।

सजीव गणपती आता पूजेची होय सिद्धता ॥

॥श्रीराम॥

प्रथम नमन ते कलशा, मुखी विष्णु वसे जया ।

कंठी रुद्र, तळी ब्रह्मा, मातृगण आत राहती ॥

कडेला सर्व समुद्र, सप्तद्वीप वसुंधरा ।

ऋग्वेद अन् यजुर्वेद, सामवेद, अथर्व ही ॥

यथासांग इथे वसती, गायत्रीही तशी वसे ।

सावित्री शांति देवोत, पुष्टी पाण्यात या असे ॥

पापहारिणी गंगा, तशी यमुना सरस्वती ।

नर्मदा, सिन्धु, कावेरी, गोदावरि तशी वसो ॥

येवोत देवपूजार्थ, कलशामध्ये वसोत त्या ।

पूजा गंधफुले वाहुन, कलशाची करणे तया ॥

घंटेची करणे पुजा, घंटा वाजविणे जरा ।

आवाहन सर्व देवा, असे जे मानिले असे ॥

पाणी पवित्र कलशातिल, घेउनी पुढिल पूजना ।

फुलाने शिंपडावे मग, पूजासाहित्य स्वत:सह ॥

आता ध्यान गणेशाचे हाती घेउनी अक्षता ।

एकदंत, शूर्पकर्ण, गजवक्त्र, चतुर्भुज ॥

ध्यावा प्रसन्नवदन, मने सिद्धिविनायक ।

पहिला उपचार म्हणुनी अक्षता वाहणे तया ॥

आवाहन गणेशाचे सुरराजार्चितेश्वर ।

अनाथनाथा, सर्वज्ञा, पूजेला गणनायका ॥

येई विनायका येथे, म्हणुनी आवाहितो तुला ।

आवाहनार्थ देवाला वाहणे, अक्षता पुन्हा ॥

नानारत्न अलंकारे, दिव्य आसन भूषित ।

मांडिले हे सुवर्णाचे, घ्यावे सिद्धिविनायका ॥

म्हणुनी आसना मूर्तीच्या, करावा स्पर्श किंचित ।

अक्षता वाहणे थोड्या आसनार्थ म्हणूनिया ॥

सर्वतीर्थांतुनी आले पाद्य चंदनयुक्त हे ।

फुलाने वाहतो पायी, स्वीकारी भक्तवत्सला ॥

गंधपुष्प तसे पाणी, अक्षतांसह अर्घ्य हे ।

गणाध्यक्षा नमो तुजला, स्वीकारी करुणानिधे ॥

एकत्र करुनी तूप, दही, मध, पळीमध्ये ।

मधुपर्कस्नान स्वीकारा, सर्वलोकेश गणपती ॥

विनायका नमू तुजला त्रिदशैरभिवंदित ।

गंगोदक स्वीकारा पाणी आचमनीय हे ॥

तूप दूध दही साखर, मध हे पायि वाहतो ।

फुलाने पंचामृतस्नान स्वीकारा गणनायका ॥

स्नानानंतर शुद्धोदक फुलाने घालणे जरा ।

मग गंधपुष्प इत्यादी साधीशी करणे पुजा ॥

विडा फळावरी पाणी सोडणे अर्पिण्यास ती ।

ठेवणे मग फुले काढुन, निर्माल्य उत्तरेकडे ॥

आता महाभिषेकार्थ, अथर्वशीर्ष वाचणे ।

म्हणणे वा पुरुषसूक्त तसा संकल्प सोडणे ॥