वार्षिक कृतज्ञता मंत्र व सांगता मंत्र

(आचमन, प्रार्थना )

श्री परमात्म्यास स्मरुनी, देववाणीसही तसे ।

कर्म निर्विघ्न करण्यास, गणेशाला नमू तसे ॥१॥

पूर्वकर्माप्रमाणे मज, लाभला नरदेह हा ।

इतिहास जाणणे,स्मरणे,कर्मे करण्या समर्थ हा ॥२॥

पूर्ण करण्यास प्रारब्धे, प्रयत्ने देव गाठण्या ।

नरदेहापरी साधन, न दुजे हित साधण्या ॥३॥

मला तसे कुणालाही, लाभे दुर्लभ साधन ।

लाभे ज्यांच्या कृपेने ते, स्मरूदे नित्य हे मन ॥४॥

श्राद्धपक्ष तयासाठी, पिंड-तर्पण-भोजन ।

योजिले धर्मकर्त्यांनी, सुसंस्कृत करण्या मन ॥५॥

कर्मे वा साधने, कर्ते, नुरता जे जसे हवे ।

मूळ हेतूस धरुनी, देवमार्ग क्रमू नवे ॥६॥

(संकल्प - देवमार्ग क्रमू नवे)

जन्मदाते पितामाता, प्रपिता आणि पूर्वज ।

कुणालाही जगी वंद्य, संबंध नित्य देहज ॥७॥

तितुकेच श्रेष्ठ संबंधी, पत्नी,श्वशुर, आत्मज ।

त्यांचेही ऋण देहास, नातेवाईक जन्मज ॥८॥

असेच ऋण जीवास, शेजारी, मित्र वा गुरू ।

जगण्यास साह्य सर्वांचे, सदाचे असते सुरू ॥९॥

कृतज्ञ राहणे त्यांचे, आहे मनुजलक्षण ।

नसता कृतज्ञता मग ते, ठरते पशुजीवन ॥१०॥

याहीपुढे मनुष्याचे, ध्येय अंतिम जे असे ।

संपवणे प्रारब्ध या जन्मी, मुक्तिही गाठणे तसे ॥११॥

त्यासाठी सद्गुरू, संत, जे जे अपुल्यास भेटती ।

कृतज्ञता जपणे त्यांची,आजन्म दुर्लभ नित्य ती ॥१२॥

श्रद्धा, कृतज्ञता आणि, कृती हे मर्म यांतिल ।

अर्घ्य तर्पण दाने ही, कर्मे गौण तयांतिल ॥१३॥

उपकारांचा कुणी कर्ता, प्रत्यक्ष असता जगी ।

भावाने कर्म प्रत्यक्ष, त्यांसाठी करणे जगी ॥१४॥

श्रद्धेच्या कृति या श्रेष्ठ, खरी श्राद्धे जगात या ।

आनंदा देत सर्वांना, जगताना जगात या ॥१५॥

कधी ते शक्य ना असते, प्रतिकूल परिस्थिती ।

कधी ना करता येते,व्यक्ती देहात असुन ती ॥१६॥

शुभदिनी, वाढदिवसास, व्यक्त करणे कृतज्ञता ।

अनुकूल म्हणुनी जमले,ओळखणे भाग्य सर्वथा ॥१७॥

मृत्यूनंतरही भाव, उपकार स्मरणे कसे ।

त्यास हा श्राद्ध वा पक्ष,मार्ग गौण असा असे ॥१८॥

आता जे करणे ते ते, प्रतीकात्मक जाहले ।

अर्घ्य द्या,दान द्या त्यात,मुख्य स्मरण हे भले ॥१९॥

सर्वांस आदरे स्मरणे, शुभभाव इथे वसे ।

अशुभ, भय नसे त्यात,प्रेमे ते करणे असे ॥२० ॥

माता वा आप्तसंबंधी, सद्गुरू संत वा कुणी ।

सूक्ष्म या जगती ग्रहण,करती सद्भाव जे मनी ॥२१॥

भूतली वावरती संत, देह ते ठेविती जरी ।

प्रेेमे अर्घ्य तया द्यावा,जागृत ते जगी जरी ॥२२ ॥

कृतज्ञता, शब्द वा श्रद्धा, या खरे कार्य साधिती ।

नसती जे अता देही, तरी त्यांस निवेदिती ॥२३॥

कृतज्ञता तशी कर्मे, मार्ग मोठा अपूर्वही ।

अंतःशुद्धी घडे त्याने, घडे संबंधशुद्धिही ॥२४॥

देहात असता ज्यांनी, संस्कार, उपकार जे ।

दिले त्यामुळे दिसती, जगी दिवस आज जे ॥२५॥

आपुले जीवन समृद्ध, करण्या गुण लाभले ।

स्मरुया आज ते सारे,टिकण्या,जगण्या भले ॥ २६॥

कृतज्ञता दिन हा वार्षिक, जाणुनी मर्म आचरू ।

शुभकर्मे अमावस्या, प्रकाशमय ही करू ॥२७॥

आता पूर्वोक्त भावाने, क्रमाने अर्घ्य अर्पुया ।

अंति या सर्व संतांना, सर्वही अर्घ्य देउया ॥२८॥

(सर्व अर्घ्य देणे, फुले अर्पण करणे, पुढील प्रार्थना म्हणणे)

देवही तृप्त भावाने, तृप्त ते मनुज, संतही ।

देवोत सर्व आशीर्वच,कल्याणा चिंतोत सर्वही ॥२९॥

कर्म करण्यात न्यूनाधिक, त्यासाठी मागतो क्षमा ।

देवहो, पूर्ण करा सर्व, एवढी प्रार्थना तुम्हा ॥३०॥

॥ॐ शांतिः शांतिः शांतिः ॥

॥ॐ तत् सत् ब्रह्मार्पणमस्तु ॥

॥विष्णवे नमो, विष्णवे नमो, विष्णवे नमः ॥

(गुणस्मरणानंतर सांगतामंत्र)

सांगतेचा एक मंत्र

कृतज्ञता गुण हा थोर, श्रद्धेने कर्मि आचरू ।

होण्या कल्याण सर्वांचे, अंती त्या ईश्वरा स्मरू ॥

सद्गुरुनाथ महाराज की जय !

सब संतन की जय !