अग्निसंस्काराचे मंत्र

॥ॐ॥

सृष्टिच्या चालका हे प्रभु, जन्ममृत्यू तुझी दया।

अगम्य बुद्धीस मनुजाच्या,जाणुनी स्थिर राहुया॥१॥

जगण्यास लागते संधी, लाभते ती तुझ्यामुळे ।

प्रारब्धे आणि कर्तव्ये, घडे उद्धार त्यामुळे ॥२॥

महाभूतांस तू आज्ञा, देउनी देह घडविशी ।

पूर्वकर्माप्रमाणे तो, या लोकी तूच धाडीशी ॥३॥

तुझे स्मरण राखूनी, कर्तव्ये आम्हि आचरू ।

पुन्हा तुझ्याकडे येण्या, सत्कर्मे नित्य ती करू॥४॥

आज आम्ही इथे जमलो, आप्तस्वजन लोकही।

ठेविला देह अमुच्यातिल,ज्यांनी त्यागून सर्वही ॥५॥

आज हा जीव आजन्म, मानवी जन्म लाभुन ।

जगला अमुच्यामध्ये, आप्तस्वजन होउन ॥६॥

जन्मदात्यास, देवास, स्मरून जगला असे ।

आज आज्ञा तुझी होता, देह तो परत देतसे ॥७॥

कर्मे अर्पण होवोत, देहासहित सर्व ती ।

शुद्ध होऊन परमात्मन्, निःशेष बनुदे स्थिती ॥८॥

प्रार्थनापूर्वक हे अग्नी, आहुती तुज देउया।

महाभूतांस ज्याचे ते, देउनी ऋणि राहुया ॥९॥

नेई तुझ्या सवे जीव, देवमार्गावरी अता ।

ज्योतीत ज्योत मिळवी ही,जीवाला दे पवित्रता ॥१०॥

कर्मे निर्दोष या जगती, करिता कधि न होत ती ।

नाम्ना साद्गुण्य भावाने,नामाने,करु पूर्ण ती ॥११॥

॥ श्रीराम ॥