श्री समर्थ रामदास स्वामींची आरती

जय श्री रामदासा समर्था सदया । 

सज्जनगडनिवासा राममय हृदया ॥धृ॥

कल्याणाचे चिंतन बालपणी केले । 

त्याच्या ध्यासे माया प्रपंच त्यागियले ।

घोर तपाने राघव सगुणी प्रगटविले । 

जगदोद्धारासाठी सर्वस्वा दिधले ॥१॥

पिंजुनि काढुनि जागृत देश हा केला । 

स्वधर्म जगण्या अवघा जन प्रेरित केला ।

स्वास्थ्याच्या शिवस्वप्ना आकार दिधला । 

कार्याने वनभुवना आनंद झाला ॥२॥

दासांसाठी बोध अक्षरमय केला । 

आत्मारामी राम शब्दी आणियला ।

हरेक श्लोक मनाचा मंत्र हा झाला ।

दीन भक्तां मार्ग करुणाष्टक दिधला ॥३॥