सावध व्हा रे सावध व्हा

सावध व्हा रे सावध व्हा ।

जाग धरा रे जाण धरा ।

उदंड सोने हिरे उधळितो ।

फुकट मिळाले ध्यानि धरा ! ॥धृ॥

नरदेहाचे सोने मुबलक ।

कष्ट न करिता झालो मालक ।

कसे कुठेही खर्च करावे ।

होइल का हो न्याय खरा ? ॥१॥

जे जे आम्हा मिळते जगती ।

ते इतरांच्या साह्यावरती ।

स्वार्थापुढती सुचे न काही ।

पटेलसा व्यवहार करा ! ॥२॥

बुद्धी शक्ती हिरे माणके ।

दीन म्हणे रे दिली कौतुके ।

दाता आणिक हेतु विसरता ।

ठरेल ना हो पशू बरा ? ॥३॥