महाराजांची शाळा

महाराजांची शाळा,

अमुच्या महाराजांची शाळा ।

नकळत सकळां वळण लाविते,

तरी लागतो लळा ॥धृ॥

नाही भिंती नाही छप्पर ।

खडू फळा ना कुठले दप्तर ।

ग्रंथ जयाचा तयाबरोबर ।

उघडा आणिक चाळा ॥१॥

घरी, मंदिरी, झाडाखाली ।

झोपडीत वा भरे महाली ।

पसरविते ही प्रेमा आणिक ।

भक्तीच्या परिमळा ॥२॥

पति, पत्नि वा मित्र असू दे ।

बाप लेक वा नात असू दे ।

सगळे शिकती एका ठायी ।

परि धडा वेगळा ॥३॥

विनामूल्य हे अमूल्य शिक्षण ।

कर्तव्याचे अवश्य पालन ।

व्यवहारातिल परमार्थाचा ।

पहा पिकविते मळा ॥४॥

आदी अंती नाम शिकविते ।

समाधान ही पदवी देते ।

तरी पुन्हा शाळेत रहाणे ।

दीन म्हणे सोहळा ! ॥५॥