रे धाव आता पंढरिनाथा

रे धाव आता पंढरिनाथा । पाऊल अडले घरी ।

रे देवा माझे । पाऊल अडले घरी ॥धृ॥

कळस तुझा दिसतो घरट्यातुन ।

हाक आर्त येते हृदयातुन ।

परि मायेचा उंबरा ओलांडे ना मज ।

हात जरा देवा धरी ...॥१॥ रे देवा माझे ...

मुले, बाळे, घर, पैसा, नाती ।

जन्मभरी मी जपली किति ती ।

परि साऱ्यांचे करुनी, नावे ठेविती बघ ।

हलकेच सुटणुक करी ... ॥२॥ रे देवा माझे ...

वाचन, गायन, मतप्रतिपादन ।

पांडित्याने आनंदे मन ।

शब्दज्ञानच चरणी येण्या अडविते दीना ।

कान प्रेमाने धरी ...॥३॥ रे देवा माझे ...