विश्रांतीचे स्थळ, स्वरूप केवळ

विश्रांतीचे स्थळ, स्वरूप केवळ ।

द्वैत तळमळ, जेथे नाही ॥१॥

जेथे नाही काया, नाही मोह माया ।

रंका आणि राया, सारिखेची ॥२॥

सारिखेची सदा-सर्वदा स्वरूप ।

तेचि तुझे रूप, जाण बापा ॥३॥

जाण बापा स्वये, तूचि आपणासी ।

सोऽहं स्मरणासी, वीसरता ॥४॥

वीसरता सोऽहं, स्मरण आपुले ।

मग गुंडाळले, मायाजाळी ॥५॥

मायाजाळी तूझा, तूचि गुंतलासी ।

यातना भोगीसी, नेणोनिया ॥६॥

म्हणोनिया होई, सावध अंतरी ।

सोऽहं दृढ धरी, दास म्हणे ॥७॥