शांत हो श्री गुरुदत्ता

शांत हो श्री गुरुदत्ता,

मम चित्ता शमवी आता |

तू केवळ माता जनिता,

सर्वथा तू हितकर्ता |

तू आप्त स्वजन भ्राता,

सर्वथा तूचि त्राता |

भयकर्ता तू भयहर्ता,

दंडधर्ता तू परिपाता |

तुजवाचुनि न दुजी वार्ता,

तू आर्तां आश्रयदाता |

मम चित्ता शमवी आता || १ || शांत हो...

अपराधास्तव गुरुनाथा,

जरि दंडा धरिसी यथार्था |

तरि आम्ही गाउनि गाथा,

तव चरणी नमवू माथा |

तू तथापि दंडिसी देवा,

कोणाचा मग करु धावा |

सोडविता दुसरा तेव्हा,

कोण दत्ता आम्हा त्राता |

मम चित्ता शमवी आता || २ || शांत हो...

तू नटसा होउनि कोपी,

दंडिताहि आम्ही पापी |

पुनरपिही चुकत तथापि,

आम्हावरि नच संतापी |

गच्छतः स्खलनं क्वापि,

असे मानुनि नच हो कोपी |

निजकृपालेशा ओपी,

आम्हावरि तू भगवंता |

मम चित्ता शमवी आता || ३ || शांत हो...

तव पदरी असता ताता,

आडमार्गी पाउल पडता |

सांभाळुनि मार्गावरता,

आणिता न दुसरा त्राता |

निजब्रिदा आणुनि चित्ता,

तू पतीतपावन दत्ता |

वळे आता आम्हावरता,

करुणाघन तू गुरुदत्ता |

मम चित्ता शमवी आता || ४ || शांत हो...

सहकुटुंब सहपरिवार,

दास आम्ही हे घरदार |

तव पदी अर्पु असार,

संसारसहित हा भार |

परी हरिसी करुणासिंधो,

तू दीनानाथ सुबंधो |

आम्हा अघलेश न बाधो,

वासुदेव प्रार्थित दत्ता |

मम चित्ता शमवी आता || ५ || शांत हो...