ऋणस्मरणमाला

मातापिता स्वजन अन् परिवार सारा ।

ज्यांनी जिवास दिधला जगती निवारा ।

बुद्धी विचार स्वर अक्षर दिव्य धारा ।

राहो सदैव स्मरणी उपकार सारा ॥१॥

आजन्म साथ करुनी जगवी जनांस ।

देणे सदैव किति हे, अवघ्या जिवांस ।

त्या सृष्टिचे ऋण फिटे, कधि का कुणास ।

आहे सदैव स्मरणे, मज पामरास ॥२॥

हातात बोट धरुनी, अवघ्या गुरूंनी ।

विद्या असंख्य दिधल्या, जगण्यास ज्यांनी ।

नेले तरून मजला मम सद्गुरूंनी ।

कर्तव्य रोज घडु दे, सकळा स्मरूनी ॥३॥

ज्यांनी जगून जपले, जगि ईश्वरास ।

शास्त्रे असंख्य रचिली, जपले कलांस ।

मूल्ये अमूल्य दिधली जगण्या जगास ।

त्यांचे सदैव ऋण हे मज पामरास ॥४॥

शास्ते असोत जन वा कुणि राजसत्ता ।

संस्था कितीक जपती जगती व्यवस्था ।

त्याही पुढे असत जो अवघ्यांस त्राता ।

आहे हरेक स्मरणे उपकारकर्ता ॥५॥

आलो कशास जगती, जगणे कशास ।

कर्तव्य काय कुठले, कळु दे मनास ।

धैर्ये जगून मरणे, मिळणे प्रभूस ।

दीना सदैव धरणे, मनि हाच ध्यास ॥६॥

-- श्रीराम --