नामनिवेदनमाला

(कोणत्याही वैयक्तिक किंवा सामूहिक

जपसांगताप्रसंगी म्हणण्यासाठी)

मंगलमूर्ती मोरया ।

बुद्धिदायका सदया ।

नामनिवेदन निर्विघ्न कराया ।

यावे विघ्नेश्वरा गणराया ॥१॥

अव्यक्त गुरुपदासि वंदन ।

व्यक्त सद्गुरूंचे स्मरण ।

संतसत्पुरुषांचे चरण ।

भक्तिभावे नमिले ॥२॥

स्थूलसूक्ष्मादि देव ।

थोर भक्तांचे समुदाव ।

विशेष धरिला आदरभाव ।

अपुल्या अपुल्या गुरुपायी॥३॥

कठीण काळाचे गणित ।

उभा देहबुद्धीचा पर्वत ।

उल्लंघोनि आम्हा दिसत ।

दिवस आज भाग्याचा ॥४॥

जे जे नाम घडले ।

ते अत्यादरे आणिले ।

सांगता प्रसंगी ठेविले ।

कृतज्ञतेने तव पाया ॥५॥

नाम घडणे ही कृपा साकार ।

त्यात सत्संगाचा आधार ।

सात्त्विक व्यक्तिगत निर्धार ।

विशेष वाटे मनाला ॥६॥

अल्पबुद्धीने नाम घडले ।

असो सदोषनिर्दोष भले ।

ते नाम आजि निवेदिले ।

प्रेमादरे भगवंता ॥७॥

राहुनी कर्तव्यी तत्पर ।

नाम स्मरू निरंतर ।

नामधर्म हा आचार ।

आम्हा ठायी सदा वसो ॥८॥

अधिकउण्यासी क्षमा करणे ।

अखंड नामप्रेमा देणे ।

नवे संकल्प तडीस नेणे ।

इतुके मागणे भगवंता ॥९॥

॥ श्री सदगुरूनाथ महाराज की जय ॥

॥ सब संतन की जय ॥