कितीक आमुची कामे अडली

कितीक आमुची कामे अडली, करीलसा हो कुणी हवा,

कामासाठी देव हवा हो, कामासाठी गुरू हवा हो,

स्वस्त, शक्यतो फुकट हवा ! ॥धृ॥

अभ्यासाची अन् कष्टांची

कुचराई ही सदा आमुची

प्रदक्षिणांवर प्रसन्न होउनि

यश देणारा कुणी हवा ! ॥१॥

गृहकलहाने कुणी ग्रासले

कुणि चिंतेने त्रस्त जाहले

औषध त्यावर स्वत:च घेउन

अम्हा मुक्त करविता हवा ! ॥२॥

धनजीवन हे स्वार्थासाठी

उधळू आम्ही कसेहि जगती

दोष आमुचे प्रकट न करिता

दूर करिलसा कुणी हवा ! ॥३॥

आत्मपरीक्षण, विचार नाही,

प्रयत्न ना अनुताप कुठेही

दीन म्हणे रे आम्हांसाठी

होइल का अवतार नवा ? ॥४॥