गुरू नव्हे , गुरे म्हणावी

गुरू नव्हे , गुरे म्हणावी पुष्कळ भरला हाट रे ।

स्वस्त मिळाले तरी त्यजावे अडक्याचे गुरु साठ रे ॥धृ॥

साधू साधू म्हणवुनि लोकी बहुतसा बोभाट रे ।

भलत्यालागी शिष्य करूनी धन घ्यावे अचाट रे ।

प्रतिवर्षी शिष्याघरि जावे मोठा पलपलाट रे ॥१॥

टोपीमाळा घालुनि पुष्कळ टाळ विण्याचा थाट रे ।

चौबारा बैसुनिया गावे मेळवुनी जन दाट रे ।

मोठ्याने आरडुनि सांगावे केले जे का पाठ रे ॥२॥

ऐसे गुरु जरि कोणी केले त्याला लाभला नाट रे ।

नरदेहासी येउनि चुकले निजप्राप्तीची वाट रे ।

निरंजनपद सांडुनि चढले यमपुरीचा घाट रे ॥३॥